ՀՀ ԿԳՆ Բարձրագույն որակավորման կոմիտեի նախագահի 22 ապրիլի 2019թ. թիվ 143Ա հրամանով «Դատական իշխանություն» գիտամեթոդական ամսագիրը վերստին ընդգրկվել է Ատենախոսությունների հիմնական արդյունքների եւ դրույթների հրատարակման համար ՀՀ ԿԳՆ բարձրագույն որակավորման կոմիտեի համար ընդունելի գիտական հրատարակությունների 2019 թ-ի ցուցակում:
Նշենք, որ ամսագիրը, մասնակի ընդհատումներով, նշված ցուցակում է 2003 թ.-ից:
Բոլորիս ցանկությունն է, որ չտարանջատվի՝ Հայաստան-Արցախ. ասում է Արցախի Հանրապետության դատավորների միության նախագահ Հասմիկ Խաչատրյանն ու հավելում. ճիշտ է՝ ունենք հայկական երկու պետություն, բայց մենք նույն ազգն ենք, նույն ժողովուրդը, նույն իրավական հարթակի վրա ենք աշխատում, ՀՀ-ում է'լ, ԱՀ-ում է'լ «դատավորը» պաշտոն չէ՝ առաքելություն է:
Արցախի դատական համակարգն, ասում է, աշխատում է բնականոն ռիթմով: Վերջին շրջանում Արցախում գործերի վերաբացման միտում չի զգացել, չի էլ նկատել, թե հասարակական հնչեղություն ունեցող գործեր լինեն: Թեպետ ընդգծում է, որ թե՛ քրեական, թե՛ քաղաքացիական դատավարությունում օրենսդրությունը թույլ է տալիս, արդարադատության բուն շահերից ելնելով, նոր երևան եկած հանգամանքների ուժով դիմել դատարան եւ գործը վերաբացել:
Դատաիրավական համակարգի կարիքները գնահատելու նպատակով Համաշխարհային բանկի մասնագետները հարցումներ կանցկացնեն մեր երկրում: Ծրագրի ընթացքը քննարկելու համար ՀՀ դատավորների միության նախագահ, ՀՀ վճռաբեկ դատարանի նախագահ Երվանդ Խունդկարյանը հանդիպել է Համաշխարհային բանկի արդարադատության բարեփոխումների բաժնի մասնագետ Եվա Միլիսի եւ Համաշխարհային Բանկի արդարադատության բարեփոխումների փորձագետ Մարիա Մատիչի հետ։
Համաշխարհային բանկի «Արդարադատության վերաբերյալ հարցման» ծրագիրը կմեկնարկի այս տարվա սեպտեմբերին, նոյեմբերին կամփոփվեն արդյունքները։ Հարցումներն անցկացվելու են դատավորների, դատախազների, դատարանի և դատախազության աշխատակիցների, փաստաբանների, ինչպես նաև դատաիրավական համակարգի հետ առնչություն չունեցող քաղաքացիների շրջանում:
«Դատավորներ կան, որ արձակուրդ են վերցնում, որպեսզի գործերի կուտակումները վերացնեն, մինչդեռ նրանք էլ են մարդ, հանգստի կարիք ունեն»,-ասում է ՀՀ դատավորների միության Խորհրդի անդամ, ՀՀ վերաքննիչ քաղաքացիական դատարանի դատավոր Նորա Կարապետյանը՝ ԱՐ հեռուստաընկերությանը տված հարցազրույցում:
Մի փոքր վիճակագրություն. տիկին Կարապետյանը նկատում է՝ 2016-ին, երբ ասացին, որ Առաջին ատյանի դատարանում քաղաքացիական գործերի թիվը հասել է 80 հազարի, իրենք անհանգստացան՝ աճի միտումն ակնհայտ էր, բա որ հասներ 100 հազարի: Երկու տարուց արդեն 130 հազար էր:
2019թ սեպտեմբերի 15-19-ին Ղազախստանի Հանրապետությունում տեղի կունենա Դատավորների միջազգային միության ամենամյա ընդհանուր ժողովը: Որպես Դատավորների միջազգային միության անդամ՝ ՀՀ դատավորների միությունից կարող է մասնակցել առավելագույնը երեք պատվիրակ: Մասնակցության պարտադիր պայմաններից է անգլերեն, ֆրանսերեն, իսպաներեն կամ ռուսերեն լեզուներից որևէ մեկի իմացությունը: Մեկնման, վերադարձի, ինչպես նաև կացության բոլոր ծախսերը հոգում են անձամբ մեկնող պատվիրակները:
Ունենք գերբեռնված դատարաններ, ինչից կարող է տուժել արդարադատության որակը. ահազանգը հնչեցրեց ՀՀ վճռաբեկ դատարանի նախագահ, ՀՀ դատավորների միության նախագահ Երվանդ Խունդկարյանը «Աջակցություն դատական բարեփոխումներին. ՀՀ-ում դատական իշխանության անկախության եւ արհեստավարժության ամրապնդումը» ծրագրի մեկնարկի արարողությանը:
Իբրեւ լուծում առաջարկեց ավելացնել դատավորների թիվը, նաեւ՝ պարզեցնել եւ արդիականացնել դատավարական ընթացակարգերը: Այս ուղղությամբ քայլեր արվել են ՀՀ քաղաքացիական դատավարության օրենսգրքի ընդունմամբ, սակայն, անելիք դեռ կա: Երվանդ Խունդկարյանը անհրաժեշտ համարեց մշտադիտարկումներ անցկացնել՝ օրենսդրական առաջարկներ մշակելու համար: