ՀՀ դատավորների միության նախագահ, ՀՀ վճռաբեկ դատարանի նախագահ Երվանդ Խունդկարյանն ընդունեց նորաստեղծ Հայաստանի վետերան դատավորների միության պատվիրակությանը, որը գլխավորում էր Միության նախագահ, ՀՀ վերաքննիչ քաղաքացիական դատարանի պաշտոնաթող նախագահ Անատոլի Մաթևոսյանը: Հայաստանի վետերան դատավորների միությունը ստեղծվել է ՀՀ վերաքննիչ քաղաքացիական դատարանի պաշտոնաթող նախագահ Անատոլի Մաթևոսյանի, ՀՀ Արարատի և Վայոց ձորի մարզերի առաջին ատյանի ընդհանուր իրավասության դատարանի պաշտոնաթող նախագահ Գագիկ Սարգսյանի և ՀՀ վերաքննիչ քրեական դատարանի պաշտոնաթող դատավոր Արարատ Պետրոսյանի նախաձեռնությամբ: Հանդիպման ընթացքում կողմերը երկուստեք կարևորեցին նմանօրինակ միության ստեղծման գաղափարը: Ներկայացվեցին նորաստեղծ Միության կանոնադրական խնդիրներն ու նպատակները:

Երվանդ Խունդկարյանը ՀՀ դատավորների միության անունից պատրաստակամություն հայտնեց համագործակցելու դատավորների առջև ծառացած խնդիրներին լուծում տալու, դատավորների իրավունքների ու շահերի պաշտպանության, այդ թվում՝ սոցիալական երաշխիքների ապահովման և այլ հարցերում միասնաբար հանդես գալու ու արդյունավետ համագործակցելու համար:

Հանդիպմանը ներկա էր նաև ՀՀ Կոտայքի մարզի առաջին ատյանի ընդհանուր իրավասության դատարանի արդեն նախկին դատավոր Աշոտ Խաչիկյանը, ով օրերս համալրել էր կենսաթոշակառու դատավորների շարքերը: Երվանդ Խունդկարյանն արդարադատության բնագավառում Աշոտ Խաչիկյանի երկարամյա աշխատանքի, ունեցած ներդրման համար և ծննդյան 65-ամյակի կապակցությամբ նրան հանձնեց ՀՀ դատավորների միության պատվոգիր՝ մաղթելով նրան առողջություն, երկար տարիների կյանք և վաստակաշատ հանգիստ:

2019 թվականի սեպտեմբերի 15-19-ը Ղազախստանի մայրաքաղաք Նուր-Սուլթանում տեղի է ունեցել Դատավորների միջազգային միության տարեկան 62-րդ համաժողովը, որին մասնակցել է նաև ՀՀ դատավորների միության պատվիրակությունը: Պատվիրակության կազմում են եղել ՀՀ վերաքննիչ քաղաքացիական դատարանի դատավորներ Գագիկ Խանդանյանը և Մարգարիտա Հարթենյանը:

Համաժողովի ընթացքում քննարկվել են դատավորների և դատական իշխանության անկախության ամրապնդմանն առնչվող մի շարք հարցեր: Դատավորների միջազգային միության չորս ուսումնական հանձնաժողովների նախագահները ներկայացրել են ուսումնասիրված թեմաների վերաբերյալ եզրակացությունները: Մասնավորապես՝ առաջին ուսումնական հանձնաժողովի ուսումնասիրության թեման էր «Սոցիալական մեդիան և դատական համակարգը», երկրորդ ուսումնական հանձնաժողովինը՝ «Դատավարության ֆինանսավորման մեծ ու փոքր խնդիրները», երրորդինը՝ «Լրատվամիջոցները քրեական գործերում. դատավարությունների ամբողջականության պաշտպանությունը և հաղորդակցությունը լրատվամիջոցների հետ», իսկ չորրորդինը՝ «Լայն իմաստով զգայական-բարոյական և սեքսուալ ոտնձգությունները և դրանց հետևանքներն աշխատանքային հարաբերություններում»:

Համաժողովի ընթացքում քննարկման առարկան են դարձել անդամ միությունների դատական համակարգերին առնչվող հարցերը, մասնավորապես՝ Լեհաստանի և Թուրքիայի դատական համակարգերում տիրող իրավիճակն ու այդ կապակցությամբ Դատավորների միջազգային ու եվրոպական միությունների կողմից ձեռնարկված միջոցառումները: Քննարկվել են նաև դատական համակարգում կոռուպցիայի դեմ պայքարին վերաբերող հիմնահարցերը, Դատավորների միջազգային միության կանոնադրության որոշ դրույթների փոփոխման վերաբերյալ հարցերը, Դատավորների միջազգային միության բյուջեին առնչվող հարցերը, Դատավորների միջազգային և եվրոպական միությունների հետագա համագործակցության շրջանակները, ինչպես նաև այլ ընթացիկ հարցեր:

Համաժողովի ընթացքում որոշվել է Դատավորների միջազգային միության հաջորդ՝ 2020 թվականի տարեկան համաժողովն անցկացնել Կոստա Ռիկայում, իսկ 2021 թվականի տարեկան համաժողովը՝ Թել Ավիվում:

Մինչդատական վարույթի վերահսկողության շրջանակներում օպերատիվ հետախուզական միջոցառումների վերաբերյալ միջնորդությունների քննարկման նոր մոտեցումներ են որդեգրվել:

ԱԱԾ-ն քննարկել է Վճռաբեկ դատարանի իրավական դիրքորոշումներն առ այն, որ դատարան ներկայացվող ՕՀՄ-ների միջնորդությունների հիմքերը և դրանցով գաղտնազերծման հնարավոր սահմանները պետք է վերանայվեն:

Հուլիսի 11-ին Դատավորների ընդհանուր ժողովը մեկնարկեց 184 դատավորի գրանցմամբ. Ժողովն իրավազոր էր, քանի որ գործող 229 դատավորների կեսից ավելին ներկայացել էր:

Օրակարգում երեք հարց էր.

1. Դատավորների ընդհանուր ժողովի կարգապահական հարցերի հանձնաժողովի անդամի ընտրություն,
2. ԲԴԽ դատավոր անդամների թափուր տեղերը լրացնելու ընտրություն՝ ՀՀ առաջին ատյանի դատարաններից,
3. Դատավորների ընդհանուր ժողովին ուղղված դիմումների՝ այդ թվում Վահե Գրիգորյանի նամակի, ներկայացում: