Եվրոպայի խորհրդի նախագահությունը Ֆրանսիայի կողմից ստանձնելու առթիվ 2019 թվականի սեպտեմբերի 12-ին և 13-ին Ֆրանսիայի մայրաքաղաք Փարիզում տեղի ունեցած Եվրոպայի խորհրդի 47 մասնակից պետությունների Գերագույն դատարանների նախագահների համատեղ գիտաժողովին Եվրոպայի խորհրդի, Ֆրանսիայի վճռաբեկ դատարանի նախագահի, Ֆրանսիայի պետական խորհրդի նախագահի և Ֆրանսիայի սահմանադրական խորհրդի նախագահի հրավերով մասնակցել է նաև ՀՀ վճռաբեկ դատարանի նախագահ Երվանդ Խունդկարյանը:

Գիտաժողովի ընթացքում քննարկման առարկա են դարձել անկախ և անկողմնակալ դատավորի առջև արդյունավետ դատական պաշտպանության իրավունքի հարցերը, ազգային դատարանների և Մարդու իրավունքների եվրոպական դատարանի միջև փոխհարաբերություններին վերաբերող հարցերը, խոսքի ազատությունը՝ անձնական և ընտանեկան կյանքը պաշտպանելու իրավունքին հակադրելուն վերաբերող հարցերը, ինչպես նաև անդրադարձ է կատարվել մարդու իրավունքների պաշտպանության եվրոպական համակարգի ամրապնդման, իրավահավասարության և իրավունքի գերակայության հարցերին, կազմակերպվել են թեմատիկ սեմինար-քննարկումներ:

Միաժամանակ գիտաժողովի մասնակիցները Ելիսեյան Պալատում ընդունելության են արժանացել Ֆրանսիայի Հանրապետության նախագահ Էմանուել Մակրոնի կողմից:

Գերմանիայի դատավորների միության և Միջազգային իրավական համագործակցության գերմանական հիմնադրամի (IRZ) համատեղ ջանքերի արդյունքում Հայաստանի, Վրաստանի, Ղազախստանի, Մոլդովայի, Ուկրաինայի, Էստոնիայի և Լեհաստանի դատավորների միությունների միջև ստորագրված համագործակցության հուշագրի շրջանակում հերթական ամենամյա համաժողովն այս անգամ տեղի է ունեցել Բոննում (Գերմանիա): Այն նվիրված էր քաղաքացիական և քրեական գործերով միջազգային համագործակցությանը: Համաժողովին մասնակցել են ՀՀ դատավորների միության անդամներ, ՀՀ վերաքննիչ քաղաքացիական դատարանի դատավորներ Գագիկ Խանդանյանը և Մարգարիտա Հարթենյանը:

Համաժողովի ընթացքում բացման խոսքով հանդես են եկել և ներկաներին ողջունել Գերմանիայի դատավորների միության նախագահ Ենս Գնիզան, Բոննի հողային դատարանի նախագահ Ստեֆան Վայզմենը, Միջազգային իրավական համագործակցության գերմանական հիմնադրամի (IRZ) ղեկավարությունը: Համագործակցության հուշագրի կողմ հանդիսացող դատավորների միությունների ներկայացուցչներն օրակարգում ընդգրկված թեմաների շրջանակներում ներկայացրել են զեկույցներ: ՀՀ վերաքննիչ քաղաքացիական դատարանի դատավոր Գագիկ Խանդանյանի զեկույցի թեման էր «Հանձնման հարցերով համագործակցությունն արտասահմանյան երկրների հետ, ներառյալ՝ կալանավորման եվրոպական հանձնարարությունը (օրդեր)», իսկ նույն դատարանի դատավոր Մարգարիտա Հարթենյանինը՝ «Դատական ակտերի ճանաչումն ու կատարումը»:

Համաժողովի ընթացքում արդյունավետ քննարկումներ են ծավալվել համագործակցության հուշագրի կողմ հանդիսացող Դատավորների միությունների ներկայացուցիչների միջև, նրանցից յուրաքանչյուրը քննարկվող թեմաների առնչությամբ ներկայացրել է սեփական երկրի օրենսդրական կարգավորումներն ու առկա պրակտիկան: Հուշագրի շրջանակներում հանդիպումները կրելու են շարունակական բնույթ, քանզի դրանք հանդիսանում են տարբեր երկրների արդարադատության համակարգերի ներկայացուցիչների փորձի փոխանակման կարևորագույն հարթակ:

Վճռաբեկ դատարանում դատարանի նախագահ Երվանդ Խունդկարյանը դեկտեմբերի 6-ին բաց քննարկում ծավալեց ԵՊՀ իրավագիտության ֆակուլտետի տարբեր կուրսերի ուսանողների հետ:

Ողջունելով ուսանողների նախաձեռնությունը՝ Երվանդ Խունդկարյանն ընդհանուր գծերով ներկայացրեց Վճռաբեկ դատարանի՝ որպես բարձրագույն դատական ատյանի սահմանադրական առաքելությունը, կառուցվածքը, օրենսդրությամբ վերապահված լիազորությունների շրջանակը, բողոքների վարույթ ընդունելու ընթացակարգերը, օրենքի մեկնաբանման առանձնահատկությունները, ինչպես նաև խոսեց Վճռաբեկ դատարանի նախադեպային իրավունքի ինստիտուտի մասին:

Երվանդ Խունդկարյանի հարցին, թե ուսանողներից քանիսը կցանկանար հետագայում դառնալ դատավոր, ներկաներից դրական պատասխան քչերը տվեցին: Վճռաբեկ դատարանի նախագահն էլ նկատեց, որ դատավորի աշխատանքը ցանկացած պրոֆեսիոնալի համար պետք է լինի երազելի աշխատանք, քանզի դատավորն է, որ գնահատկան է տալիս ցանկացած կառույցի կամ վարչական մարմնի կատարած գործողությունների օրինականությանը:

Նա կարևորեց նաև դատավորների դերի հանրային ընկալման գործոնը՝ նկատելով, որ իրենց ասելիքը հանրությանը դատավորները պետք է ներկայացնեն միայն իրենց ընդունած դատական ակտերով և իր համոզմամբ՝ դատավորները սոցիալական հարթակներում անելիք չունեն:

Ապագա իրավաբաններին հետաքրքրող հարցերի շրջանակն ընդգրկուն էր՝ նեղ մասնագիտական հարցերից մինչև դատավորների ծանրաբեռնվածություն, դատարանի շենքային պայմաններ:

Հանդիպման ավարտին Երվանդ Խունդկարյանի մաղթանքը ուսանողներին հետևյալն էր՝ երբեք չխուսափել հիմնավորված սեփական մտքերն անկաշկանդ արտահայտելուց:

Անմիջական զրույցից զատ ուսանողները շրջայց կատարեցին Վճռաբեկ դատարանի շենքում, եղան գրադարանում, նիստերի սպիտակ և կարմիր դահլիճներում: