ՀՀ դատավորների միությունը Արցախի Հանրապետության անկախության 32-րդ տարեդարձի առթիվ շնորհավորում և վստահություն է հայտնում, որ Արցախը կմնա կանգուն, որի գրավականը ողջ հայության միասնությունն է:

Հարգելի՛ գործընկերներ,

ՀՀ դատավորների միությունը, որը անկախ հասարակական միավորում է, հիմնվել է դատավորների շահերի ընդհանրության, կամավոր անդամության և ինքնակառավարման սկզբունքներով,  ստեղծվել է դատական իշխանությանն աջակցելու, դատավորների իրավունքների պաշտպանության, դատավորների անկախության և դատական իշխանության հեղինակության բարձրացման, անկախ դատական իշխանության առաքելության հանրային ընկալման մակարդակը բարձացնելու, դատական իշխանության և դատավորների նկատմամբ հասարակական վստահության ամրապնդման և հասարակությունում իրավունքի գերակայության երաշխավորման նպատակներով։

Իրավասու մարմնի թողտվության հետևանքով Միությունը, համակողմանիորեն անդրադառնալով և արձագանքելով դատական իշխանության և դատավորների անկախության առջև ծառացած մարտահրավերի, փաստացի իրականացնում է նաև գործառույթներ, որոնք ՀՀ Սահմանադրության և ՀՀ դատական օրենսգիրք սահմանադրական օրենքի կարգավորումներով վերապահված են հենց այդ մարմնին՝ Բարձրագույն դատական խորհուրդին։

Վերահաստատում ենք՝ Միությունը շարունակելու է հավատարիմ մնալ իր առաքելությանը:

Միությանը կարող են անդամագրվել և նրա գործունեությանն իրենց մասնակցությամբ և աջակցությամբ նպաստել ինչպես գործող, այնպես էլ նախկին այն դատավորները, որոնք իրենց գործի նվիրյալներ են, գիտակցում են իրենց սահմանադրական առաքելությունն իրականացնելու ողջ նշանակությունը, միավորված են ընդհանրական այնպիսի գաղափարներով և նպատակներով, ինչպիսիք են՝ դատավորների և դատական իշխանության անկախության, հեղինակության պաշտպանությունը ու ամրապնդումը։

Միևնույն ժամանակ կոչ ենք անում բոլոր այն դատավորներին, որոնք իրենց գործունեությունը չեն տեսնում Միության կանոնադրական տիրույթում, լքել մեր շարքերը՝ դրանով իսկ աջակցելով Միության ինքնամաքրմանը:

Հարգելի՛ դատավորներ,

Դատավորների ինքնակառավարման միակ և օրենքով ամրագրված մարմինը` դատավորների ընդհանուր ժողովը, 2023 թվականի հուլիսի 19-ին, ներկա գտնվող դատավորների բացարձակ մեծամասնությամբ, բաց քվեարկությամբ, բացառիկ կամք դրսևորեց դեմ արտահայտվելով ՀՀ Սահմանադրությանը հակադրվող` դատավորների անկախության սկզբունքից չբխող և դրսից հրամցվող օրակարգին` հստակ արձանագրելով մի քանի կարևոր հանգամանքներ.

• Որպես դատավորների ինքնակառավարման միակ և լեգիտիմ մարմին` դատավորների ընդհանուր ժողովն է կոչված ապահովվելու Սահմանադրությամբ և օրենքով ամրագրված դատարանների` ի դեմս դատավորների գործունեության արդյունավետ կառավարումը:
• Դատական իշխանությանը բացառապես սպասարկելուն կոչված ոչ անկախ մարմին հանդիսացող Դատական դեպարտամենտը փորձել է կանխորոշել և սխալ է մեկնաբանել ԲԴԽ ձևավորման գործընթացը` տվյալ պահին ծանուցելով միայն ՀՀ մարզերի դատարանների դատավորներին, անտեսելով խորհրդի անդամի չափանիշներին համապատասխանող Երևան քաղաքի քրեական դատարանի դատավորների՝ ընտրվելու, իսկ դատավորներին իրենց անկախությունը երաշխավորող պատշաճ մարմին ձևավորելու իրավունքը: 
• Դատական դեպարտամենտն իրավասու չէ կանխորոշել և նախընտրած եղանակով մեկնաբանել ԲԴԽ ձևավորման ընթացակարգը՝ սահմանափակելով դատավորների ընտրությունը:
• Քվեարկությամբ ընդունվել է առաջարկ` ոչ արդյունավետ կամ դատավորների անկախությունը անտեսող վարքագիծ դրսևորած ԲԴԽ դատավոր անդամին ընդհանուր ժողովով հետ կանչելու նախագիծ պատրաստելու անհրաժեշտության մասին:

Մինչդեռ անտեսելով դատավորների ընդհանուր ժողովում բաց քվեարկությամբ արտահայտած դիրքորոշումը` նախորդ ժողովում արձանագրվածի տոտալ անտեսմամբ` առանց որևէ հարց քննարկելու, ժամկետներ պահպանելու և որևէ պատճառաբանության ու լեգիտիմ նպատակի, օգոստոսի 4-ին կրկին հրավիրվել է ընդհանուր ժողով այն օրակարգով, ինչը մերժվել էր դատավորների բացարձակ մեծամասնության կողմից:

Օգոստոսի 4-ի ժողովին ընդառաջ դատավորների նկատմամբ կարգապահական վարույթներ նախաձեռնելու, լիազորությունները դադարեցնելու, առաջխաղացման ցուցակներից հանելու սպառնալիքների ներքո հրամցվում է ժողովին պարտադիր մասնակցելու և նախընտրած թեկնածուին ընտրելու «օրակարգ», որն անշեղորեն վաղ թե ուշ, այլ գործողությունների հետ միասին, արժանանալու է իրավական գնահատականի և հետևանքների:

Կոչ ենք անում դատավորներին անտեսել սպառնալիքները և փակ քվեարկությամբ առաջնորդվել ՀՀ Սահմանադրությամբ և խղճով: 

Նկատի ունենալով այն հանգամանքը, որ պաշտոնաթող դատավորները ցանկություն են հայտնում պահպանել ՀՀ դատավորների միությանն իրենց անդամակցությունը, ուստի, տեղեկացնում ենք, որ  անհրաժեշտ է (ԴՄ կանոնադրության 6-րդ հոդված) ՀՀ դատավորների միության խորհրդին ներկայացնել այդ մասին հավաստող դիմում՝ թղթային տարբերակով:

Դիմումն անհրաժեշտ է ուղարկել ՀՀ դատավորների միություն՝ Վազգեն Սարգսյան 5 հասցեով:

Միաժամանակ տեղեկացնում ենք, որ Միությանն անդամակցել ցանկացող նորանշանակ դատավորները ևս, կանոնադրության նույն հոդվածի պահանջի համաձայն, կարող են դիմում ներկայացնել:

Գործող դատավորների անդամավճարը յուրաքանչյուր ամսվա համար կազմում է 5000 ՀՀ դրամ, իսկ Միության անդամ նախկին դատավորները վճարում են անդամավճար՝ 50 տոկոսի չափով: