ՀՀ նախագահ Վահագն Խաչատուրյանի հոկտեմբերի 17 հրամանագրով դատավոր Մեսրոպ Մակյանը նշանակվել է ՀՀ վերաքննիչ քրեական դատարանում կոռուպցիոն հանցագործությունների գործերով բողոքարկման ենթակա դատական ակտերի վերանայումն իրականացնող առանձին դատավոր:
Նշենք, որ Մեսրոպ Մակյանը 2013 թվականից եղել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր։
Այսօր Ազգային ժողովում պատգամավորների և Կարեն Անդրեասյանի միջև հարց ու պատասխանի ժամանակ վերջինս հայտարարել է. «Վերջերս դատավորներից մեկն ասաց, եթե Կարեն Անդրեասյանը գալիս է դատական համակարգ իր նախկին խոսքերով, թող չգա, եթե գալիս է նոր խոսքերով, թող գա կամ՝ նոր մոտեցումներով…»:
Թեև Անդրեասյանն այդ հայտարարության մեջ չի նշում դատավորի անունը, և բարձր ամբիոնից դատավորի խոսքը խեղաթյուրված է ներկայացնում՝ հարկ ենք համարում մենք ներկայացնել, ինչպես դատավորի անունը, այնպես էլ նրա խոսքը բառացի:
Այսպես, սեպտեմբերի 23-ին՝ ՀՀ դատավորների ընդհանուր ժողովից րոպեներ առաջ, լրագրողը Երևան քաղաքի առաջին ատյանի ընդհանուր իրավասության դատարանի դատավոր Արման Հովհաննիսյանին հարց է տվել այն մասին, որ մամուլում որպես ԲԴԽ նախագահի թեկնածու շրջանառվում է Կարեն Անդրեասյանի անունը, դատավորն ի՞նչ դիրքորոշում ունի այդ առնչությամբ:
Ի պատասխան հարցի՝ Արման Հովհաննիսյանն ասել է. «Եթե իր նախկին տրամադրվածությամբ պետք է գա, այո՛, ես լավ չեմ նայում, իսկ եթե գալիս է՝ իրականում արդյունավետ աշխատանք իրականացնելու, որևէ վերապահում չունեմ»:
Արդյոք Կարեն Անդրեասյանի կողմից միտումնավո՞ր են խեղաթյուրվել դատավոր Հովհաննիսյանի բառերը, թե՞ նա ընկալման հետ խնդիր ունի:
Կից ներկայացնում ենք նաև համացանցում առկա դատավոր Ա. Հովհաննիսյանի պատասխանը պարունակող տեսանյութը:
Երևան քաղաքի առաջին ատյանի ընդհանուր իրավասության դատարանի դատավոր Դավիթ Հարությունյանը հերթական անգամ մասնակցել է «IRONMAN» հեղինակավոր մրցաշարին, որն այս անգամ անցկացվել է Բարսելոնա քաղաքում: Այս անգամ ևս Դավիթ Հարությունյանը մրցաշարին մասնակցել է Արցախի դրոշի ներքո:
Դատավորը՝ 3,86 կմ լողը, 180,25 կմ հեծանվավազքը և 42,195 կմ վազքը հաղթահարել է 15 ժամ 21 րոպեում՝ արժանանալով եռակի երկաթե մարդ կոչմանը:
Նշենք, որ «IRONMAN» եռամարտն աշխարհում համարվում է մեկօրյա մրցույթներից բարդագույներից մեկը: Մրցույթն անց է կացվում 1978 թվականից:
ՀՀ նախագահ Վահագն Խաչատուրյանի սեպտեմբերի 29-ի հրամանագրով Գրիգոր Հովհաննիսյանը նշանակվել է ՀՀ վերաքննիչ քրեական դատարանի դատավոր:
Նշենք, որ Գրիգոր Հովհաննիսյանը 2016 թվականից եղել է Արարատի և Վայոց ձորի մարզերի առաջին ատյանի ընդհանուր իրավասության դատարանի դատավոր, իսկ 2019 թվականի մարտի 5-ին նշանակվել է Արարատի և Վայոց ձորի մարզերի առաջին ատյանի ընդհանուր իրավասության դատարանի նախագահ՝ երեք տարի ժամկետով:
Սեպտեմբերի 28-ին Սյունիքի մարզի առաջին ատյանի ընդհանուր իրավասության դատարանը՝ նախագահությամբ Լուսինե Սեփխանյանի, անպարտ է ճանաչել և հռչակել է դատավոր Բորիս Բախշիյանի անմեղությունը:
Դատավորների միությունը շարունակելու է հետևել դատավոր Բախշիյանի գործի ընթացքին:
Հիշեցնենք, որ դատավոր Բորիս Բախշիյանին մեղադրանք էր առաջադրվել իր վարույթում քննվող գործերից մեկով ամբաստանյալին իբրև ակնհայտ ապօրինի կալանավորելու մեջ և դատավորը հիշյալ մեղադրանքով տևական ժամանակ գտնվել է անազատության մեջ:
Սեպտեմբերի 23-ին տեղի ունեցավ ՀՀ դատավորների ընդհանուր ժողով: Օրակարգում Դատավորների գործունեության գնահատման հանձնաժողովի դատավոր և դատավոր չհանդիսացող անդամների ընտրության հարցն էր։
Դատավորները՝ 189 կողմ ձայնով Երևան քաղաքի առաջին ատյանի ընդհանուր իրավասության դատարանի դատավոր Դավիթ Հարությունյանին ընտրեցին Դատավորների ընդհանուր ժողովի Դատավորների գործունեության գնահատման հանձնաժողովի դատավոր անդամ:
Միաժամանակ նաև տեղեկացնենք, որ 90 կողմ ձայնով Դատավորների ընդհանուր ժողովի Դատավորների գործունեության գնահատման հանձնաժողովի դատավոր չհանդիսացող անդամ ընտրվեց Տաթևիկ Սուջյանը: