Բարձրագույն դատական խորհուրդը Հանրապետության նախագահին առաջարկել է  Երևան քաղաքի առաջին ատյանի ընդհանուր իրավասության դատարանի դատավորի թափուր պաշտոնում նշանակել Արամ Համլետի Մկրտչյանին:

«Հայաստանի Հանրապետության դատական օրենսգիրք» սահմանադրական օրենքի 117-րդ հոդվածով սահմանված կարգով Հանրապետության նախագահի հրամանագիրն ուժի մեջ մտնելու պահից Արամ Համլետի Մկրտչյանի՝ Լոռու մարզի առաջին ատյանի ընդհանուր իրավասության դատարանի դատավորի լիազորությունները համարել դադարած: 

Որոշումն ուժի մեջ է մտնում հրապարակմանը հաջորդող օրվանից:

Սիրելի՛ կանայք ՀՀ դատավորների միությունը շնորհավորում է գարնան, սիրո և գեղեցկության տոնի՝ մարտի 8-ի կապակցությամբ:

Ձեր ներգրավվածությունը բարելավվում և հարստացնում է ցանկացած ոլորտ, իսկ հոգատարությունն ու նվիրումը՝ կյանքին նոր բովանդակություն հաղորդում։

Լույսն ու գեղեցկությունը, որ օրավուր սփռում եք Ձեր շուրջը, թող փոխադարձվի անվերապահ սիրո մեծ չափաբաժնով, գնահատանքով ու ջերմությամբ:

Մարտի 8-ն այդ ամենի խորհրդանշական իմաստավորման օրն է: Կրկին շնորհավորելով տոնի առթիվ՝ մաղթում ենք խաղաղություն, առողջություն և բարձր տրամադրություն։

ՀՀ դատավորների միության նախագահ Ալեքսանդր Ազարյան

ՀՀ ԱԺ նախագահի տեղակալ, ԱԺ նախագահի լիազորությունները կատարող Հակոբ Արշակյանը Վճռաբեկ դատարանի քրեական պալատի դատավորների թեկնածուների առաջադրման մասին հայտարարություն է ստորագրել, որում մասնավորապես նշվում է.

Հայաստանի Հանրապետության Սահմանադրության 166-րդ հոդվածի 3-րդ մասի և «Ազգային ժողովի կանոնակարգ» սահմանադրական օրենքի 143-րդ հոդվածի 2-րդ մասի համաձայն` Բարձրագույն դատական խորհուրդը Վճռաբեկ դատարանի քրեական պալատի դատավորի  թափուր տեղերից մեկի համար առաջադրել է Մեսրոպ Մակյանի, Աննա Մարգարյանի և Արսեն Նիկողոսյանի  թեկնածությունները, իսկ դատավորի մյուս թափուր տեղի համար՝ Լուսինե Աբգարյանի, Սերգեյ Մարաբյանի և Ռուբիկ Մխիթարյանի թեկնածությունները:

Հարգելի’ պարոն Թաթոյան,

Թույլ տվեք ՀՀ դատավորների միության անունից արտահայտել մեր խորին երախտագիտությունը Հայաստանի Հանրապետությունում ժողովրդավարության, և մասնավորապես, մարդու իրավունքների պաշտպանության զարգացման բնագավառում Ձեր անգնահատելի ներդրման համար։

Ձեր պաշտոնավարման ավարտին պետք է արձանագրենք, որ Մարդու իրավունքների պաշտպանի գրասենյակը, Ձեր անհատական և ողջ անձնակազմի աշխատանքի շնորհիվ, Մարդու իրավունքների պաշտպանի ինստիտուտի դերը ու նշանակությունը Հայաստանի Հանրապետությունում բարձրացվել է նոր մակարդակի և օրինակելի է դարձել ողջ աշխարհում, առանց որի այլևս դժվար է պատկերացնել հայաստանյան իրականությունը։

Մարդու իրավունքների պաշտպանի կառույցի կարևորությունն առավել ակներև դրսևորվել է 2020 թվականի սեպտեմբերի 27-ին Ադրբեջանի կողմից սանձազերծված պատերազմի և հետպատերազմյան ժամանակաշրջանում։

Ձեր ղեկավարությամբ Մարդու իրավունքների պաշտպանի գրասենյակի գործունեությունը բարձր արդյունավետություն է արձանագրել հատկապես բնակչության առավել խոցելի խմբերի` գերիների, տեղահանվածների, այլևս սահմանամերձ համայնքների բնակիչների, հաշմանդամների, կանանց իրավունքների պաշտպանության ոլորտում, այն առավել մեծ կարևորություն է ստացել նաև ներկայիս օրհասական պահին, երբ վտանգված է դատական իշխանության անկախությունը` որպես ժողովրդավարության ապահովման կարևոր երաշխիք։

Սրտանց մաղթում ենք անկոտրում կամք, անսպառ եռանդ և նորանոր հաջողություններ Ձեր հետագա գործունեության ընթացքում:

ՀՀ Դատավորների միության նախագահ՝     Ալեքսանդր Ազարյան