Հարգելի՛ դատավորներ,

Դատավորների ինքնակառավարման միակ և օրենքով ամրագրված մարմինը` դատավորների ընդհանուր ժողովը, 2023 թվականի հուլիսի 19-ին, ներկա գտնվող դատավորների բացարձակ մեծամասնությամբ, բաց քվեարկությամբ, բացառիկ կամք դրսևորեց դեմ արտահայտվելով ՀՀ Սահմանադրությանը հակադրվող` դատավորների անկախության սկզբունքից չբխող և դրսից հրամցվող օրակարգին` հստակ արձանագրելով մի քանի կարևոր հանգամանքներ.

• Որպես դատավորների ինքնակառավարման միակ և լեգիտիմ մարմին` դատավորների ընդհանուր ժողովն է կոչված ապահովվելու Սահմանադրությամբ և օրենքով ամրագրված դատարանների` ի դեմս դատավորների գործունեության արդյունավետ կառավարումը:
• Դատական իշխանությանը բացառապես սպասարկելուն կոչված ոչ անկախ մարմին հանդիսացող Դատական դեպարտամենտը փորձել է կանխորոշել և սխալ է մեկնաբանել ԲԴԽ ձևավորման գործընթացը` տվյալ պահին ծանուցելով միայն ՀՀ մարզերի դատարանների դատավորներին, անտեսելով խորհրդի անդամի չափանիշներին համապատասխանող Երևան քաղաքի քրեական դատարանի դատավորների՝ ընտրվելու, իսկ դատավորներին իրենց անկախությունը երաշխավորող պատշաճ մարմին ձևավորելու իրավունքը: 
• Դատական դեպարտամենտն իրավասու չէ կանխորոշել և նախընտրած եղանակով մեկնաբանել ԲԴԽ ձևավորման ընթացակարգը՝ սահմանափակելով դատավորների ընտրությունը:
• Քվեարկությամբ ընդունվել է առաջարկ` ոչ արդյունավետ կամ դատավորների անկախությունը անտեսող վարքագիծ դրսևորած ԲԴԽ դատավոր անդամին ընդհանուր ժողովով հետ կանչելու նախագիծ պատրաստելու անհրաժեշտության մասին:

Մինչդեռ անտեսելով դատավորների ընդհանուր ժողովում բաց քվեարկությամբ արտահայտած դիրքորոշումը` նախորդ ժողովում արձանագրվածի տոտալ անտեսմամբ` առանց որևէ հարց քննարկելու, ժամկետներ պահպանելու և որևէ պատճառաբանության ու լեգիտիմ նպատակի, օգոստոսի 4-ին կրկին հրավիրվել է ընդհանուր ժողով այն օրակարգով, ինչը մերժվել էր դատավորների բացարձակ մեծամասնության կողմից:

Օգոստոսի 4-ի ժողովին ընդառաջ դատավորների նկատմամբ կարգապահական վարույթներ նախաձեռնելու, լիազորությունները դադարեցնելու, առաջխաղացման ցուցակներից հանելու սպառնալիքների ներքո հրամցվում է ժողովին պարտադիր մասնակցելու և նախընտրած թեկնածուին ընտրելու «օրակարգ», որն անշեղորեն վաղ թե ուշ, այլ գործողությունների հետ միասին, արժանանալու է իրավական գնահատականի և հետևանքների:

Կոչ ենք անում դատավորներին անտեսել սպառնալիքները և փակ քվեարկությամբ առաջնորդվել ՀՀ Սահմանադրությամբ և խղճով: 

Նկատի ունենալով այն հանգամանքը, որ պաշտոնաթող դատավորները ցանկություն են հայտնում պահպանել ՀՀ դատավորների միությանն իրենց անդամակցությունը, ուստի, տեղեկացնում ենք, որ  անհրաժեշտ է (ԴՄ կանոնադրության 6-րդ հոդված) ՀՀ դատավորների միության խորհրդին ներկայացնել այդ մասին հավաստող դիմում՝ թղթային տարբերակով:

Դիմումն անհրաժեշտ է ուղարկել ՀՀ դատավորների միություն՝ Վազգեն Սարգսյան 5 հասցեով:

Միաժամանակ տեղեկացնում ենք, որ Միությանն անդամակցել ցանկացող նորանշանակ դատավորները ևս, կանոնադրության նույն հոդվածի պահանջի համաձայն, կարող են դիմում ներկայացնել:

Գործող դատավորների անդամավճարը յուրաքանչյուր ամսվա համար կազմում է 5000 ՀՀ դրամ, իսկ Միության անդամ նախկին դատավորները վճարում են անդամավճար՝ 50 տոկոսի չափով:

ՀՀ նախագահ Վահագն Խաչատուրյանի հուլիսի 27-ի հրամանագրով ՀՀ վերաքննիչ քաղաքացիական դատարանում դատավոր է նշանակվել:

Այսպես, Արարատի և Վայոց ձորի մարզերի առաջին ատյանի ընդհանուր իրավասության դատարանի դատավոր Իվան Բաղմանյանը նշանակվել է ՀՀ վերաքննիչ քաղաքացիական դատարանի դատավոր:

Հարգելի՛ դատավորներ,

2023 թվականի հուլիսի 19-ին կայանալու է դատավորների ընդհանուր ժողով, որի օրակարգում ի թիվս այլ հարցերի ներառված է նաև Բարձրագույն դատական խորհրդի դատավոր անդամի ընտրության հարցը:

Բարձրագույն դատական խորհրդի դատավոր անդամ ընտրելու և դատավորների անկախությունը երաշխավորող սահմանադրական մարմնի օրինական ձևավորման գործընթացը կրկին վտանգված է:

Թեկնածուների ընտրությունը օրենքի պահանջներին հակառակ սահմափակվել է՝ մասնավորապես, ոչ անկախ մարմին հանդիսացող Դատական դեպարտամենտը ծանուցել է բացառապես ՀՀ մարզերի դատարանների դատավորներին՝ կրկին անտեսելով խորհրդի անդամի չափանիշներին համապատասխանող Երևան քաղաքի քրեական դատարանի դատավորների՝ ընտրվելու, իսկ դատավորներին իրենց անկախությունը երաշխավորող պատշաճ մարմին ձևավորելու իրավունքը: 

Նշված շարունակական և անօրինական գործելակերպը լի է պետության համար բացասական մարտահրավերներով:

Ավելի վաղ՝ 2022 թվականի մարտի 22-ին ևս հայտարարվել էր Սահմանադրության համապատասխան Բարձրագույն դատական խորհուրդ ձևավորելու հնարավորությունը դեպարտամենտի կողմից խախտելու մասին:

Ուստի, կոչ ենք անում դատավորներին տեր կանգնել իրենց իրավունքներին և Սահմանադրության ճիշտ կիրառմանը՝ քանզի Դատական դեպարտամենտը չի կարող ըստ իր հայեցողության կամ այլոց թելադրմամբ մեկնաբանել, կանխորոշել և ձևավորել սահամանադրական անկախ մարմինը, որը պետք է երաշխավորի դատական իշխանության անկախությունը, իսկ վերոհիշյալ գործելաոճի բացասական հետևանքների կրողը դատավորներն են ու արդարադատության շահառուն՝ հանրությունը: