ՀԱՅՏԱՐԱՐՈՒԹՅՈՒՆ

Եվրոպական միության բարձրագույն դատական դատարանների նախագահների ցանցի, Դատական համակարգի խորհուրդների եվրոպական ցանցի, Դատավորների եվրոպական միության, Պետության խորհուրդների միության և Բարձրագույն վարչական իրավասությունների միության

Մարդու իրավունքների կոպիտ խախտումը, ինչպես նաև դատական կառույցների շարունակական ոչնչացումները և արդարադատության հանդեպ ցանկացած անկախ մոտեցման վերացումը` մասնավորապես կին դատավորների իրավունքների անտեսումն Աֆղանստանում, ևս մեկ անգամ մեզ հիմք է տալիս համախմբվածություն ցուցաբերել շահագրգիռ անձանց հանդեպ և կոչ անել եվրոպական իշխանություններին ցուցաբերել հնարավոր առավելագույն աջակցություն։

Աֆղանստանում դատական համակարգի շարունակական փլուզումը հզոր հիշեցումն է առ այն, որ դատական իշխանության անկախությունը կենսականորեն անհրաժեշտ է օրենքի գերակայության պահպանման համար, որը եվրոպական միասնականության և ամբողջականության անկյունաքարն է և ամրագրված է Մարդու իրավունքների համընդհանուր հռչակագրում: Դատական ​​իշխանության անկախությունը ժողովրդավարական հասարակությունում մարդու իրավունքների և հիմնարար ազատությունների հարգման երաշխիքն է։ Դատական անկախությունը, ըստ էության, նշանակում է ազատություն հարկադրանքից, ինչպես ֆիզիկական կամ հոգեբանական սպառնալիքներից, այնպես էլ կառավարությունների կողմից դատական համակարգի ներսում քննադատական կարծիքների անօրինական ճնշումից:

Պետությունների արդարադատության համակարգերի նկատմամբ հանրության վստահությունն ապահովելու և ամրապնդելու համար Եվրոպայի ու ամբողջ աշխարհի դատական մարմինները պետք է միասնականորեն լինեն համախմբած, ամրապնդեն փոխադարձ վստահությունը և պաշտպանեն դատական անկախությունը: Եվրոպայում և ամբողջ աշխարհում դատավորները և դատախազները պետք է այնպիսի դիրքում լինեն, որպեսզի կարողանան իրականացնել արդարադատություն՝ անկախ իրենց սեռից, կրոնական կամ քաղաքական համոզմունքներից կամ ռասայից: