Հ1-ի խնդրանքով Վճռաբեկ դատարանի նախագահ Երվանդ Խունդկարյանը անդրադարձել է երկրորդ նախագահ Ռոբերտ Քոչարյանի կալանքի հիմքերի վերաբերյալ Սահմանադրական Դատարանի որոշմանը: Ըստ Երվանդ Խունդկարյանի՝ Սահմանադրական դատարանի կայացրած ակտը չի կարող բեկանել Վճռաբեկ դատարանի որոշումը: Այն կարող է միայն հանդիսանալ նոր հանգամանք, բայց նաև դրա գնահատականն է վերապահված գործը քննող դատարանին:

«Ո՛չ ՍԴ-ն, ո՛չ էլ Եվրոպական դատարանը չի կարող համարվել 4-րդ ատյան, նույնիսկ նոր հանգամանքների պարագայում՝ ինքը՝ Վճռաբեկ դատարանն է որոշում՝ վերանայի իր կողմից կայացրած որոշումը, թե ոչ: Բոլոր դեպքերում օրենսդրությունը դա համարում է որպես նոր հանգամանք, իսկ թե դրան ինչ գնահատական կտա յուրաքանչյուր դեպքում գործը քննող դատարանը, ես մասնագիտական էթիկայից ելնելով՝ ճիշտ չեմ համարում որևէ գնահատական տալ»,-ասել է ՀՀ վճռաբեկ դատարանի նախագահը: