ՀՀ կառավարությունը կքննարկի դատավորների սոցիալական երաշխիքների ապահովման հետ կապված նախագիծ: Դրանով դատավորները կներառվեն սոցիալական փաթեթի շահառուների ցանկում: Այս մասին Աժ-ում՝ Կառավարության ծրագրի քննարկման ժամանակ, հայտնեց ՀՀ վարչապետ Նիկոլ Փաշինյանը` պատասխանելով «Իմ քայլը» խմբակցության պատգամավոր, ՀՀ ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանի հարցին:

Պատգամավորը հետաքրքրվեց դատական իշխանության անկախության և սոցիալական երաշխիքների ստեղծման մասին:

Նրա դիտարկմամբ՝ Կառավարության ծրագրում կարմիր թելով անցնում է դատական իշխանության անկախության գիծը և այստեղ մեծ նշանակություն ունի, որ կառավարությունն իրապես հանձն է առել դատական իշխանության անկախությանը ոչ միայն չմիջամտելու, այլև պոզիտիվ պարտավորություններ իրականացնելու միջոցով:

«Վերջին շրջանում շատ է խոսվում այն մասին, որ դատական իշխանությունը, ստանալով անկախություն գործադիր և օրենսդիր մարմիններից, թիրախավորվել է էքսոջեն միջամտությունների տեսանկյունից, այսինքն՝ ոչ պետական մարմինները փորձում են միջամտել դատական իշխանությունների գործունեությանը՝ ինչ-որ առումով խաթարելով դրանց անկախությունը: Կառավարության ծրագրով ի՞նչ քայլեր եք ձեռնարկելու դատական իշխանության անկախությունը երաշխավորելու համար այս արտաքին միջամտություններից»,- հարցն ուղղեց Վարդանյանը:

Փաշինյանը արձագանքեց՝ նկատելով, որ կար ժամանակ, երբ դատավորների աշխատավարձերը Հայաստանյան չափանիշներով շատ բարձր էին համարվում, բայց հիմա այդ վիճակը այնքան էլ այդպես չի ընկալվում. «Իրոք, դատավորների սոցիալական երաշխիքների հարցը վերադառնում է օրակարգ: Մենք մտադիր ենք այդ հարցը լրջորեն քննարկել: Սակայն պետք է ապահովել հավասարակշռությունների մեխանիզմը, մանավանդ որ, մենք իսկապես պետք է հստակ հասկանանք՝ ում, երբ, ինչքան, որպեսզի հանրային և քաղաքական իմաստով հավասարակշռությունները չկորցնենք:

Կառավարության նիստի օրակարգում մենք դատավորների սոցիալական երաշխքիների հետ կապված նախագիծ ունենք, այնքանով, որ նրանց ներառում ենք սոցփաթեթների շահառուների ցուցակում, որը կարծում եմ շատ էական հանգամանք է»:

Փաշինյանը կրկնեց իր քաղաքական թիմի դիրքորոշումը, որ Հայաստանում պետք է լինի անկախ դատական համակարգ, նաև վեճերի այլընտրանքային կարգավորման մեխանզիմները պետք է գործեն. «Մենք հիմա նաև քննարկում ենք նոտարներին փոքր վեճերի կարգավորման որոշակի լիազորություններ ընձեռելու հարցը, որպեսզի դատական համակարգի ծանրաբեռնվածությունը եւս ընկնի»:

Դատական համակարգի նկատմամբ միջամտությունների մասին վարչապետը նշեց. «Կարծում եմ՝ հրապարակային դրսևորումները շատ նուրբ գիծ ունեն: Մենք մի կողմից պետք ապահովենք ժողովրդավարությունը և մարդկանց արտահայտվելու իրավունքը, բայց, մյուս կողմից, դրանք որևէ կերպ չպետք է սահմանափակեն դատական համակարգի անկախությունը և փաստաբանների գործունեությունը: Այս առումով. մեր կառավարության դիրքորոշումը միանշանակ է, որ փաստաբանական գործունեության հստակ երաշխիքներ պետք է լինեն և նրանք որևէ անձի պաշտպանելիս՝ չպետք է ատելության առարկա դառնան»: