ՀՀ վերաքննիչ քրեական դատարանը՝ նախագահությամբ դատավոր Սերգեյ Մարաբյանի, դատավորներ Տիգրան Սահակյանի եւ Սևակ Համբարձումյանի, դիմել է Սահմանադրական դատարան՝ վիճակելով 2018 թ-ի նոյեմբերի 1-ին ընդունված՝ «Էրեբունի-Երեւանի հիմնադրման 2800-ամյակի եւ Հայաստանի Առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 4-րդ հոդվածի 2-րդ մասը և դրա հետ փոխկապված՝ 2-րդ հոդվածի 10-րդ կետը:

Դրանք հնարավորություն են տալիս համաներում կիրառել անձի նկատմամբ, եթե անգամ նա չի հատուցել տուժողին պատճառած վնասը, ավելին՝ տուժողին ուղղորդում են վնասների հատուցման հարցով հայց ներկայացնել քաղաքացիական դատավարության կարգով: ՀՀ վերաքննիչ դատարանը խնդրում է Սահմանադրությանը հակասող և անվավեր ճանաչել այդ դրույթները եւ համաներման կիրառման համար պարտադիր պայման սահմանել տուժողին հանցագործությամբ պատճառված վնասը հատուցած լինելը:

ՀՀ Սահմանադրական դատարանը դիմումը ընդունել է վարույթ, պատճենը ուղարկել պետական տարբեր մարմինների՝ դիրքորոշման համար:

Այս հարցով ՍԴ նիստը նշանակված է փետրվարի 26-ին: